Anthropic, лидер во развојот на вештачка интелигенција и креатор на моделот Claude, најави основање на „фонд за јавно добро“, дизајниран да обезбеди поголема флексибилност и финансиски капацитет за поддршка на проекти од пошироко општествено значење.
Според официјалното соопштение, компанијата ќе издвои пет отсто од своите акции за овој нов фонд. Фондот ќе функционира како посебен правен субјект во целосна сопственост на компанијата, со вграден механизам за иден раст: за секое зголемување од 50 отсто на вкупната вредност на компанијата, дополнителни два отсто од акциите автоматски ќе се доделуваат на фондот.
Компанијата наведе неколку клучни области кон кои би можеле да се насочат овие средства, вклучително и значителни грантови за традиционални непрофитни организации, како и можност за директна финансиска помош за одредени популации и ранливи групи.
Посебен фокус ќе биде ставен на последиците што автоматизацијата и вештачката интелигенција ги имаат врз пазарот на трудот. Иако Anthropic претходно издвои 200 милиони долари специјално за проучување на влијанието на вештачката интелигенција врз работните места, компанијата предупредува дека тоа веќе не е доволно.
„Со оглед на темпото на напредок во вештачката интелигенција, можеби ќе бидат потребни значително похрабри пристапи. Овој фонд ќе ја има флексибилноста да ги спроведе таквите пристапи во пракса“, нагласуваат од компанијата.
Овој потег доаѓа во чувствителен период за технолошката индустрија во целина, која сè повеќе се соочува со јавен скептицизам и отпор. Извршниот директор на Anthropic, Дарио Амодеи, претходно отворено предупреди дека индустријата за вештачка интелигенција моментално се соочува со суштинска криза на доверба.
Прашањето за тоа кој точно ќе одлучува за распределбата на средствата и кои проекти ќе имаат приоритет, засега останува отворено; од компанијата изјавија дека во наредните месеци ќе споделат повеќе детали во врска со структурата на управување и критериумите за финансирање.
(Klix.ba)
(фото: Pexels/Cottonbro Studio)
