Глобалниот пазар на паметни телефони се намали за 22 отсто во третиот квартал од 2026 година во споредба со истиот период минатата година, паѓајќи на 255,3 милиони единици – што претставува најголем меѓугодишен пад досега забележан во еден квартал, според прелиминарните податоци на аналитичката фирма IDC.
Падот се забрзуваше од квартал во квартал. Податоците на IDC покажуваат дека испораките се намалиле за 2,9 отсто во првиот квартал (на 293,8 милиони единици) и за 6,7 отсто во вториот квартал (на 277,5 милиони единици).
IDC ова го припишува на кризата со мемориски чипови, предизвикана од вештачката интелигенција, која ги зголеми цените на компонентите до невидени нивоа и ги наруши синџирите на снабдување.
Набила Попал, виш директор за истражување во IDC, предупреди дека најлошото допрва претстои и дека пазарот сè уште го нема допрено дното. Според неа, трошоците за меморија се зголемени за приближно 350 отсто во споредба со минатата година, а цените продолжуваат да растат.
Франсиско Џеронимо, потпретседател во IDC, истакнува дека притисокот сега се префрла од производителите врз потрошувачите. Како што повисоките цени стигнуваат до полиците во продавниците, многу купувачи одлучуваат подолго да ги задржат своите постоечки уреди.
Во третиот квартал Samsung испорача 57,8 милиони телефони – што претставува пад од 5,8 отсто – додека Apple испорача 57,3 милиони, што е пад од 4%. Кај Xiaomi падот изнесува 29,2 отсто, кај OPPO 34,5 отсто, а кај vivo 31,5 отсто.
Според Џеронимо, кинеските брендови – поради нивната зависност од евтини модели – мораат да избираат помеѓу заштита на профитните маржи и одржување на обемот на продажба.
IDC очекува растот на пазарот да остане ограничен во текот на 2027 година, при што секое потенцијално закрепнување се одложува најрано за 2028 година. Во својата августовска прогноза Counterpoint Research исто така предвидува пад од 14,3 отсто на глобалните испораки за целата 2026 година, при што кризата ќе продолжи и во 2027 година.
(Klix.ba)
(фото: Pexels/Andrey Matveev)
