На автопатот Донгбу во Сеул се наоѓа тунел долг 479 метри. Тој е изграден од соларни панели кои истовремено ја блокираат бучавата од сообраќајот и произведуваат електрична енергија. Според градската управа на Сеул, тунелот се наоѓа на делницата помеѓу населбата Сангје 8-донг во округот Новон и границата со градот Ујџеонгбу, зафаќајќи површина од 5.472 квадратни метри. Проектот бил завршен во 2020 година, за време на проширувањето на автопатот.
Соларните панели не се само поставени на покривот на стандардна бариера за заштита од бучава, туку самиот тунел е составен од 2.736 панели, кои истовремено обезбедуваат и звучна изолација. Електраната има вкупен капацитет од 902,8 киловати. Таа годишно произведува приближно 830.000 киловат-часови електрична енергија – количина доволна за да ги задоволи потребите на околу 300 домаќинства.
Градските власти проценуваат дека електраната ја намалува емисијата на јаглерод диоксид за приближно 367 тони годишно. Според нивните пресметки, тоа е еднакво на ефектот од садење 132.120 дрвја.
Градот не издвоил буџетски средства за панелите. Тие биле поставени од компанијата Dasco, која ќе управува со електраната во текот на 20 години, ќе ги задржува приходите од производството на електрична енергија и ќе му плаќа на градот закупнина за земјиштето.
По истекот на овој период сопственоста врз електраната ќе премине на градот. Според податоците на самиот град, Сеул заштедил 1,36 милијарди вони одлучувајќи се за ова решение, наместо да користи конвенционални стаклени бариери за заштита од бучава. Градските власти го претставија тунелот како прв од ваков вид во светот.
„Не само што ја блокираме бучавата, туку произведуваме и соларна енергија, со што го правиме животот во Сеул попријатен“, изјави тогаш Хан Џе-хјун, директор на градската Управа за инфраструктура. На 11 август јужнокорејската влада усвои измени на прописот за обновливи извори на енергија, кои стапија на сила на 18 септември, соопшти Министерството за клима, енергија и животна средина.
Претходно локалните власти самостојно одредуваа колку далеку од патиштата и станбените населби треба да бидат лоцирани соларните електрани – растојание кое се движеше од 100 до 1.000 метри.
Според новите правила, општините повеќе не можат да пропишуваат точно одредено растојание помеѓу соларните електрани и патиштата. Што се однесува до станбените населби кои се состојат од најмалку пет куќи, тие можат да бараат растојание од најмногу 200 метри.
Од Министерството наведуваат дека целта е инвеститорите однапред да ги знаат условите под кои можат да градат, притоа осигурувајќи дека интересите на жителите се почитуваат.
(Klix.ba)
(фото: Chat GPT)
