Во американската сојузна држава Тексас, Претставничкиот дом усвои закон со кој на малолетниците може целосно да им се забрани користење на социјалните мрежи. Иако ова е американски закон, овој потег покренува важни прашања и за нас во Европа – особено родителите, воспитувачите и сите кои се загрижени за дигиталната благосостојба на младите.
Нацрт-законот, предложен од пратеникот Џаред Патерсон, има за цел да им забрани на лицата помлади од 18 години да отвораат профили на социјалните мрежи. Од социјалните мрежи ќе се бара да имплементираат системи за проверка на возраста, како што е проверка на лични документи или други трансакциски податоци. Родителите би можеле да побараат затворање на постоечките профили на нивните деца, а доколку платформите одбијат, тие се соочуваат со законска одговорност.
Иако европските закони веќе ги регулираат дигиталните права на децата, многу експерти и родители ширум Европа ја делат истата загриженост што го поттикна овој закон во Тексас. Се почесто се поставува прашањето дали пристапот до социјалните медиуми треба дополнително да се ограничи поради нивното влијание врз менталното здравје на децата и младите.
Според податоците презентирани од Патерсон, стапката на самоповредување кај младите е драстично зголемена, а социјалните мрежи се повеќе се поврзуваат со анксиозност, депресија и чувство на социјална изолација. Во едно истражување дури 48% од тинејџерите признале дека социјалните мрежи повеќе им штетат отколку што имаат корист.
Законот, исто така, предвидува дека секоја социјална мрежа ќе мора да прикажува предупредување за штетното влијание врз менталното здравје секогаш кога корисникот ќе ја отвори апликацијата, слично на предупредувањата за штетното влијание на пушењето врз здравјето. Ова може да стане преседан за глобалните платформи кои работат и во Европа.
Но, законот има и противници. Некои тврдат дека барањата за проверка на идентитетот може дополнително да ја нарушат приватноста на корисниците, што е веќе чувствително прашање во Европа. Постои и прашање за ограничување на слободата на говорот, особено кај младите луѓе кои ги користат социјалните медиуми за да ги изразат своите ставови или да учествуваат во општествени и политички дебати.
Исто така, се поставува прашањето како таквиот закон би влијаел врз младите кои ги користат социјалните медиуми за да креираат содржина, да генерираат приход или да се промовираат себеси – на пример, спортистите кои бараат стипендии или соработки.
(ABC)
(фото: Facebook)
