Министерството за внатрешна безбедност на САД нареди итно отстранување на кинескиот модел за вештачка интелигенција DeepSeek од сите цивилни агенции, наведувајќи ризици од шпионажа и пренос на чувствителни податоци кон Пекинг. Министерството за внатрешна безбедност (DHS) воведе сеопфатна забрана за користење на DeepSeek во сите цивилни федерални агенции и нивните ИТ системи.
Во известување објавено во Федералниот регистар, DHS го опиша ризикот поврзан со користењето на DeepSeek како потенцијален канал за „пренос на чувствителни податоци“ – кои им припаѓаат на вработените во американската влада и на надворешните соработници – кон кинеската влада.
Врз основа на оваа директива, цивилните агенции, како што се Агенцијата за заштита на животната средина (EPA) и Федералната комисија за комуникации (FCC), мора да престанат да ги користат сите производи на DeepSeek и да го отстранат секој постоечки софтвер или алатки поврзани со него. Од DHS напоменаа дека моделите на DeepSeek би можеле да „содржат злонамерен софтвер (малвер) или други безбедносни ранливости“. Известувањето, исто така, го оневозможува учеството на DeepSeek во какви било договори со федералната влада.
Наредбата на DHS доаѓа набргу откако DeepSeek го претстави својот најнов модел, V4.1-Flash-1017, кој компанијата го опиша како „попаметен, побрз и поефикасен“. Сепак, ова не е првпат оваа кинеска компанија за вештачка интелигенција да се соочи со пречки во односите со американската влада – особено во време кога нејзините поевтини модели на вештачка интелигенција почнуваат да им конкурираат на решенија како што се ChatGPT или Gemini. Минатата година двајца членови на Конгресот на САД предложија закон со кој би се забранил четботот со вештачка интелигенција DeepSeek на владините уреди.
(B92)
(фото: Pexels/Matheus Bertelli)
