Групацијата Прада денес објави дека по шест месеци чекање за регулаторно одобрување, го презеде Версаче, а тој договор е вреден 1,25 милијарди евра. Извршен претседател на куќата ќе биде Лоренцо Бертели, наследник на групацијата Прада и раководител на корпоративната општествена одговорност, пишува Vogue.
Аквизицијата на модната куќа Версаче се случи во април оваа година, откако компанијата се соочи со сериозни финансиски тешкотии во последните пет години. Приходите на брендот само во 2025 година се намалија за 15 проценти на 193 милиони долари, соопшти поранешниот сопственик на Версаче, Capri Holdings, кој го стави брендот на продажба во февруари, додека Прада ги објави своите планови за аквизиција на куќата во април 2025 година.
Групацијата Прада, која управува со брендовите на Прада, Миу Миу и Черч, е една од ретките луксузни компании кои во голема мера го издржаа забавувањето на луксузниот пазар и би можеле да бидат добро позиционирани да го зајакнат бизнисот на Версаче, според аналитичарите. Лоренцо Бертели изјави за Vogue дека е јасно дека Versace сега ќе има можност целосно да влезе во „светот на индустриското производство“. Тој оцени дека Versace е естетски различен од постоечкото портфолио на Prada, што е предност бидејќи нема преклопување во креативниот пристап и целната публика.
Аквизицијата ѝ овозможува на Prada да достигне нови клиенти и да ја шири пораката на брендот на поинаков начин, како и да го искористи „огромниот потенцијал“ на Versace, додаде Бертели. Како што е наведено, Донатела Версаче ќе остане глобален амбасадор на куќата.
„Апсолутно сум воодушевена што Versace стана дел од семејството Prada. Џани и јас отсекогаш имавме големо восхитување кон Миуча, Патрицио и нивното семејство. Почестена сум што брендот е во рацете на толку доверлив италијански семеен бизнис и подготвена сум да ја поддржам оваа нова ера за брендот на кој било начин што можам“, напиша таа на својот Инстаграм во април.
Како што објавува порталот „Бизнис на модата“ (BoF), вистинската работа штотуку започнува, а напорите на Прада да го оживее иконскиот бренд основан од Џани Версаче ќе бараат многу труд и трпение, особено во следните 12 месеци.
(Blic)
Фото – Flickr
