Падот на писменоста и разбирањето на читањето ги принуди шведските власти да ја ограничат дигитализацијата во училиштата. По години интензивна дигитализација на образованието, Шведска даде важна препорака – враќање на хартијата, моливот и класичните книги во училниците.
Одлуката доаѓа по загрижувачките резултати, што покажуваат пад на концентрацијата и послабо разбирање на читањето кај децата. Експертите во Шведска предупредуваат дека прекумерната употреба на дигитални уреди во училиштата негативно влијае на развојот на децата. Иако лаптопите и таблетите беа воведени пред една деценија, резултатите од меѓународните тестови покажаа пад на вештините за разбирање на читањето.
Психологот Мартина Кварантан Шмитран објаснува дека пишувањето со рака активира повеќе делови од мозокот отколку пишувањето на тастатура, што директно влијае на подобрата меморија и разбирање на материјалот.
„Кога детето пишува, активно учествува во процесот на креирање, размислува и поврзува информации. Со дигиталните алатки честопати се сведува на пасивно преземање содржини“, истакнува таа.
Затоа, шведските власти одлучија дека дигиталните алатки не се соодветни за најмладите возрасти, особено во градинките и пониските одделенија од основното училиште. Исто така, се нагласува дека технологијата го намалува директниот контакт помеѓу учениците и наставниците, што може негативно да влијае на процесот на учење.
Писателот Урош Петровиќ смета дека технологијата не треба да се фрла, но предупредува дека пишувањето рачно не треба да се занемарува.
„Кога пишувате нешто рачно, навистина го создавате. Само го запишувате на тастатурата“, нагласува Петровиќ.
Експертите исто така истакнуваат дека пишувањето игра важна улога во емоционалниот развој на децата, бидејќи поттикнува размислување, анализа и критички став кон информациите.
Сепак, се нагласува дека решението не е целосно отфрлање на технологијата, туку наоѓање рамнотежа. Децата треба да бидат подготвени за дигиталното општество, но со зачувување на основните вештини како што се читање, пишување и концентрација.
Заклучокот на шведските експерти е јасен – технологијата може да биде корисна алатка, но не смее да ги замени темелите на образованието.
(Byka.com)
(фото: Pxhere)
