Официјално се објавени номинациите за најдобри локации за снимање филмови, ТВ серии и реклами кои ги доделува Светската асоцијација на менаџери на локации (LMGI – Location Managers Guild International). Србија по прв пат се најде на оваа листа благодарение на рекламата „Органска храна за сите“ („Organic food for all”) за германскиот бренд Penny, која е снимана во центарот на Белград.
За впечатливите кадри од Теразија, стариот железнички мост и крововите на новобелградските блокови е заслужна продукциската куќа Emote од Белград и целосниот домашен сценографски тим заедно со околу 700 членови на екипата, статисти и логистичари кои учествувале во реализацијата на најамбициозниот рекламен спот снимен во Србија минатата година.
„Кога се занимавате со реклами не размислувате често за нaгради од овој тип затоа што тоа најчесто не е крајната цел на оваа продукција. Затоа нам во Еmote ни е многу драго што сме дел од избрана група и имаме чест да се натпреваруваме со најголемите светски продукци, како и да бидеме на истото доделување награди како и HBO и Netflix. Penny беше битен проект како за нас, така и за целата наша индустрија и за позиционирање на Белград на мапата на најпожелни дестинации за снимање разни проекти“ изјавија од Emote.
Прогласувањето и доделувањето на наградите ќе се одржи на 21 септември во Лос Анџелес. Проектот „Органска храна за сите“ е номиниран во конкуренција со проекти како „Dream Crazy” на Nike, кој инаку беше номиниран и за наградата „Еми“; кампањата на Huawei со Гал Гадо снимана на Исланд итн.
Во продолжение погледнете ја рекламата која ја смести Србија меѓу најпосакуваните локации за снимање реклами во светот.
