Иако Финска се смета за една од најбезбедните и најсреќните земји во светот, под Хелсинки се наоѓа широк систем за цивилна заштита, мрежа од тунели, сали и засолништа кои можат да го сместат речиси целото население на градот во случај на криза.
Финскиот главен град има околу 5.500 засолништа со вкупно 955.000 места, доволно за да ги заштити сите граѓани на Хелсинки и околните области. Низ целата земја бројот на засолништа достигнува неверојатна бројка од околу 50.000.
Според законот, поголемите станбени и јавни згради мора да имаат свое засолниште, додека жителите на помалите или постарите згради имаат обезбедени заеднички засолништа, честопати вкопани длабоко во гранитната карпа. Она што го издвојува финскиот систем е фактот дека многу засолништа во мирно време функционираат како дел од градскиот живот, вклучувајќи базени, теретани, скејт-паркови, игралишта, културни и спортски објекти, па дури и театри.
Еден од најголемите, Итакескус, може да смести околу 3.800 луѓе во итни ситуации, а денес е претворен во голем градски базенски комплекс со базен со олимписки димензии, лизгалки, теретана, па дури и шест сауни.
Засолништата се опремени со дебели челични врати, филтри за воздух, сопствени извори на енергија, тоалети, а поголемите објекти имаат и области за деконтаминација од хемиски или нуклеарни опасности. Системот е дизајниран така што може да биде подготвен да ги прими граѓаните во рок од 72 часа.
Поради густата мрежа на тунели, Хелсинки усвои урбанистички план за подземен град во 2011 година, со кој се регулира изградбата и користењето на просторот под површината. Граѓаните имаат пристап до мапи и информации за најблиските засолништа, а интересот значително се зголеми по руската агресија во Украина.
Многу подземни простори денес имаат двојна функција, служат како места за рекреација и игра, но можат брзо да се трансформираат во безбедни засолништа во итни ситуации. Една популарна атракција е Леикилуола, детска пештера лоцирана 18 метри под земја, со лизгалки и трамболини. Исто така, постојат метро станици, културни места и Музејот на цивилната заштита, сите обележани со син триаголник на портокалова позадина, дизајнирани да издржат уривање на згради и зрачење.
Во итни ситуации на радио, телевизија и на мобилната апликација 112 се емитува општ алармен сигнал, со кој им се наредува на граѓаните да се засолнат во подземни објекти.
Хелсинки е пример за тоа како еден град може да ги комбинира безбедноста и секојдневниот живот во едно, покажувајќи дека засолништата не се резервирани само за опасностите од војната, туку и за спорт, култура и игра.
(Bizlife)
(фото: Flickr)
