Deitsche Telekom, Orange, Telefonica и Vodafone објавија во заедничка изјава дека потпишале писмо за намери во врска со потенцијална заедничка понуда за фреквенции за мобилни сателитски услуги (MSS) во Европа. Целта е да се развие таканаречена услуга „директно до уредот“ – воспоставување врска помеѓу сателитите и стандардните мобилни телефони.
Според изјавата, четирите оператори ќе изградат инфраструктура на копнена мрежа во Европа, заедно со клучни функции за координација и следење, но нема да инвестираат директно во самата сателитска констелација. Тоа ќе го обезбеди сателитски партнер, кој сè уште не е избран.
Компаниите наведуваат дека нивната цел е да се справат со побарувачката за покриеност во недоволно опслужените области, да ја зајакнат отпорноста на јавните мрежи, да ги заштитат критичните комуникации и да го поддржат развојот на европска констелација. Пристапот до овие услуги би бил отворен и недискриминаторски за сите мобилни оператори. Писмото за намери не влијае на постојните сателитски партнерства на компаниите.
Во мај Европската унија објави план за доделување на поголемиот дел од вредните сателитски фреквенции за мобилна телефонија на европските компании, а воедно намалување на уделот достапен за американските оператори.
Четирите оператори се насочени кон една третина од опсегот од 2 GHz резервиран за европските компании. Според предлогот, сателитскиот оператор кој го обезбедува поголемиот дел од спектарот мора да биде во мнозинска сопственост на европска фирма. Тековните лиценци треба да истечат во 2027 година.
SpaceX се спротивставува на предлогот на ЕУ за ограничување на пристапот на странските компании до спектарот. Starlink веќе има договори со европски партнери – вклучувајќи го и Deutsche Telekom – но нема права за спектар за самостојно да ги нуди овие услуги во рамките на ЕУ.
Vodafone има заедничко вложување 50-50 со американската компанија AST SpaceMobile; овој аранжман би морал да се промени за Vodafone да може да се натпреварува за спектарот.
(Klix.ba)
(фото: Pexels/Pixabay)
